O 25 de Abril, Luou acolle o acto de presentación da candidatura do Proxecto Común porque o pobo é quen máis ordena

TEO. Venres, 31 de marzo de 2023 – María López, Maló, candidata do Proxecto Común de Teo (PXCT) á alcaldía nas eleccións municipais do vindeiro 28 de maio, vén de pechar a lista do Pexeceté, que foi ratificada pola asemblea local, o pasado venres 24 de marzo. Maló amósase moi satisfeita do equipo que constitúe “para lograr unha quinta lexislatura que lle dea continuidade ás de Martiño Noriega e Rafa Sisto e manter Teo como unha referencia de ben gobernar”.

Neste sentido, os primeiros dezasete postos da candidatura contan con nove persoas que xa acompañaron os anteriores rexedores, incluída a propia Maló, para darlle continuidade ao proxecto e aportar a imprescindible experiencia, e incorpora oito novas, algunhas que se estrean na política e outras que debutan nunha lista electoral, aínda que levan tempo militando ou participando activamente nela.

Dunha banda, figuran representadas as trece parroquias que forman o concello de Teo a través de vinte e tres persoas (seis suplentes) vinculadas, ben con asociacións veciñais, ben culturais, ben escolares ou outros eidos laborais ou de colaboración, e con intensa implicación en cadansúa parroquia.

Por outra banda, a aspirante a rexedora do Pexeceté considera un privilexio que o Proxecto Común consiga ilusionar a xente nova e salienta, especialmente, a inclusión na candidatura dunha moza de 20 e un mozo de 23 anos polo propio valor intrínseco da renovación e pola súa toma de conciencia política.

Por riba de todo, Maló quere dar as grazas ás vinte e dúas persoas que a acompañan na lista, a moitas outras coas que falou e declinaron facelo, e todas aquelas que fixeron, fan ou farán apoios públicos ao PCXT, “un espazo político que existe na medida en que hai xente que aínda nos segue apetecendo termar do noso concello”.

Desde mañá, persoa a persoa, día a día na nosa web e redes sociais_

Unha vez rematado este proceso, o Pexeceté vai dar a coñecer as persoas que conforman a lista a partir de mañá, sábado 1 de abril, facendo cadrar cada día co número que ocupan na candidatura deica o día 23 de abril, precisamente, cando pecha o prazo para inscribilas diante da Xunta Electoral de Zona de Santiago.

Así, o PXCT busca darlle o relevo que merece cada candidata/-o, ao tempo que informa á veciñanza sobre quen son as integrantes do proxecto que vai votar o 28 de maio. Para iso, presenta cada día do mes a unha das persoas da lista, cadrando co número que ocupa nela, a través duns datos biográficos básicos, acompañados da foto e dun breve texto persoal. De feito, as dezasete persoas que resulten elixidas nas urnas, ese cuarto domingo de maio, serán as encargadas de votar, no pleno constituínte da Corporación, o sábado 17 de xuño, a persoa que ocupará a alcaldía de Teo que, o PXCT confía en que sexa María López.

O 25 de Abril, en Luou: FOI, É SERÁ. O pobo é quen máis ordena!

Nun día tan emblemático como o 25 de Abril, 49 aniversario da Revolución dos caraveis, o PXCT prevé organizar, en Luou, un acto oficial de presentación da candidatura que pecha, como é costume, o alcalde saínte, Rafa Sisto, no nº 17.

A parroquia natal de Sisto será testemuña do adeus do seu fillo á alcaldía, despois de 8 anos, e da fin dun ciclo de 20 traballando no Concello, desde os comicios do 25 de maio de 2003, cando entrou como concelleiro da oposición xunto con Martiño Noriega e dúas compañeiras máis.

Amais, a mesma carballeira de Luou, servirá de escenario para a benvida de María López, veciña da mesma parroquia, como aspirante á alcaldía como cabeza da lista do Proxecto Común de Teo, quen se encargará de presentar as 22 persoas que a acompañan no reto de revalidar a alcaldía e o goberno de Teo.

FOI Martiño Noriega, É Rafa Sisto e SERÁ Maló porque o pobo é quen máis ordena.

Martes publícase a convocatoria das eleccións no BOE_

Precisamente, a semana que vén, coincidindo coas vacacións escolares da semana santa, ponse en marcha a maquinaria electoral, xusto o martes, 4 de abril, coa publicación no Boletín Oficial do Estado (BOE) do Real Decreto da convocatoria das eleccións locais e autonómicas en doce comunidades e Ceuta e Melilla.

Nese mesmo Real Decreto, indicarase que as listas serán proclamadas, definitivamente, o luns 1 de maio, e que a campaña durará quince días, comezando ás cero horas do venres 12 de maio e finalizando ás vinte e catro do venres 26. É ben lembrar que esta convocatoria afecta tamén ás todopoderosas Deputacións Provinciais, cuxos membros serán elixidos unha vez celebradas as eleccións segundo os resultados obtidos nos partidos xudiciais.

Os 32 concellos de 10.001 a 20.00o habitantes elixen 17 edís_

O concello de Teo rexistra 18.918 habitantes, consonte o último censo referido ao 1 de xaneiro de 2022, polo que elixe, nos comicios do 28 maio, 17 edís, segundo contempla a Lei Orgánica 5/1985, de 19 de xuño, do Réxime Electoral Xeral.

Dos 313 concellos galegos, só 33 se sitúan na mesma franxa de Teo, de 10.001 a 20.000, que elixe 17 edís, sendo o noso o terceiro máis poboado cunha diferenza de 58 habitantes co tamén coruñés de Boiro e, de 556 co pontevedrés de Moaña:

No que se refire aos 281 municipios restantes, 23 contan con máis poboación có noso e, a maioría, 257, quedan por baixo dos 10.000 habitantes, incluso máis de 200 por debaixo dos 5.000 habitantes.

O Porriño 20.408
Lalín 20.201
A Estrada 20.106
Con máis de 100.000 > 27 edís – 3 municipios
Vigo 292.374
A Coruña 244.700
Ourense 103.756

Entre 50.001 e 100.000 > 25 edís – 4 municipios
Santiago 98.179
Lugo 97.211
Pontevedra 82.828
Ferrol 64.158